“စီမံခန့်ခွဲမှုအမှားများနဲ့ (YBS) ယခင် (မထသ) အတိုင်းဖြစ်တော့မလား”

“ဘယ်စနစ်နဲ့ ပြေးဆွဲနေတာလဲ (YBS)”

ရန်ကုန်တိုင်း ဒေသကြီး အစိုးရကဦးဆောင်ပြီး မ.ထ.သ မှ YBSစနစ်ကို အချိန်ယူပြင်ဆင်ခဲ့ခြင်းမရှိဘဲ ပြုပြင်ပြောင်းလဲမှုပြုလုပ်ခဲ့သည်မှာ ယခုဆိုလျင် သုံးနှစ်ကိုပင် ကျော်လွန်လာခဲ့ပြီဖြစ်သည်။ထိုကဲ့သို့ သုံးနှစ် ကျော်ဆိုသည့် အချိန်ကာလတစ်ခုကိုဖြတ်သန်းလာပြီးချိန်တွင် မ.ထ.သ မှ YBSစနစ်သို့ ပြောင်းလဲမှုတွင် မည်သည့် အရာ များကောင်းမွန်လာပြီး မည်သည့် အရာများက ယခင်အတိုင်းပင်ရှိသေးသည်ကို နှိုင်းယှဉ်ကြည့်ရန်လိုအပ်သည်ဟုထင်ပါသည်။

ထို့ကြောင့် YBSစနစ်သည် မည်သည့် စနစ်ကို အခြေခံပြီးပြေးဆွဲနေသည်ကို နေ့စဉ်ဘတ်စ်ကားစီးနင်းနေသူတစ်ယောက်အတွက် ကိုယ်တွေ့အဖြစ်အပျက်များကို အခြေခံကာ ပြောတင်ပြလိုပါသည်။ယခင်မထသခေတ်က အထူးကားနှင့် ရိုးရိုးကားဟူ၍ နှစ်မျိုးရှိခဲ့ပြီး အထူးကားများကို နှစ်ရာကျပ်သတ်မှတ်ထားပြီး ရိုးရိုးကားများကို တစ်ရာကျပ်သတ်မှတ်ခဲ့သည်။ထိုအထူးကားများသည် အဲကွန်းတပ်သည်ဟုသာ စာကပ်ထားသော်လည်း ကိုးဆယ်ရာခိုင်နှုန်းသောကားများမှာ အဲကွန်းမပါရှိခဲ့ပေ။

ထို့ကြောင့် မ.ထ.သကို နေ့စဉ်စီးနင်းအသုံးပြုနေရသည့် ခရီးသွားပြည်သူများသည် YBSအပြောင်းအလဲ ကို သောင်းသောင်းဖျဖျ ကြိုဆိုခဲ့သည်ကို စတင်ပြောင်းလဲစဉ်က တွေ့မြင်ခဲ့ကြသည်။YBSစနစ်သို့ ပြောင်းလဲမှုတွင် သက်ဆိုင်ရာတာဝန်ရှိသူများက ယာဉ်အကူများမရှိစေလိုသောကြောင့် ငွေထည့် သည့် ပုံးများကို YBSယာဉ်များတွင် တစ်ပြေးညီ တပ်ဆင်ခိုင်းခဲ့သည်။ထို့ကြောင့် မေးစရာရှိသည်က YBSယာဉ်များတွင် သက်ဆိုင်ရာလူကြီးများပြောသကဲ့သို့ ယာဉ်အကူများအမှန်တကယ်ပပျောက်ပြီလားဟူ၍ဖြစ်သည်။

မြေနီကုန်းမှ တာမွေ သုဝဏ္ဏသို့ပြေးဆွဲနေသော မီနီဘတ်စ်လေးများ၊လှိုင်သာယာ အောင်မင်္ဂလာအဝေးပြေးသို့ပြေးဆွဲနေသော မီနီဘတ်လေးများ ၇၇ကဲ့သို့ မီနီဘတ်လေးများ၊၁၀ကားကဲ့သို့ မီနီဘတ်စ်လေးများစသဖြင့် မီနီဘတ်စ်အများစုဖြင့် ပြေးဆွဲနေသော ယာဉ်လိုင်းများတွင် YBSစတင်ပြောင်းလဲပြေးဆွဲစဉ်ကစပြီး ယနေ့အချိန်အထိ ယာဉ်အကူ များဖြင့်ပြေးဆွဲနေသည်ကိုတွေ့မြင်နေရသည်။

အဓိကပြောလိုသည်မှာ ယာဉ်အကူရှိခြင်းမရှိခြင်းကိုထောက်ပြပြောဆိုလိုရင်းမဟုတ်ဘဲ မတည်နိုင်သည့် ကတိကဝတ်များဖြင့် ကြွေးကြော်ခဲ့သိုကိုသာပြောလိုချင်းဖြစ်သည်။ထိုထက်ပို၍ပြောရမည်ဆိုလျင် ယာဉ်အကူပါရှိသည်ဆိုပါက ငွေအကြွေပြသနာကို ယာဉ်အကူကဖြေရှင်းပေးနိုင်သကဲ့သို့ဆင်းမည့်မှတ်တိုင်မသိလျင်လည်း ယာဉ်အကူကို အကူအညီတောင်းခံနိုင်ပါသေးသည်။

ထိုသို့ပြောခြင်းကြောင့် ယာဉ်အကူရှိသည်ကိုထောက်ခံခြင်းမဟုတ်ပေ။ အဘယ့်ကြောင့်ဆိုသော် ပုဂ္ဂလိကယာဉ်လိုင်းတစ်လိုင်းဖြစ်သည့် ကိုတရုတ်လေးဦးဆောင်သော Power11ယာဉ်လိုင်းသည်ပင် ယာဉ်အကူမပါရှိဘဲ မည်သည့် မှတ်တိုင်ကိုရောက်ရှိပြီးလာမည့် မှတ်တိုင်မှာ မည်သည့် မှတ်တိုင်ဟု အလိုလျှောက် ကြေငြာပေးသည့် စနစ်ကို အသုံးပြုထားသည်။

ထို့ပြင် ရန်ကုန်တိုင်းအစိုးရဦးဆောင်ဖွဲ့စည်းထားသောYUPTနှင့် YUPBကုမ္ပဏီက ယာဉ်များတွင်လည်း ထိုစနစ်ထည့် သွင်းထားသောကြောင့် ယာဉ်စီးနင်းသူများအတွက် အဆင်ပြေသည်ဟုပြောနိုင်ပါသည်။

အဓိကပြောချင်သည့် နောက်တစ်ချက်မှာ ကိုတရုတ်လေးကဲ့သို့ ပုဂ္ဂလိက ကုမ္ပဏီတစ်ခုသည်ပင် ယာဉ်အကူမပါဘဲ ဘတ်စ်မှတ်တိုင်များကို အလိုလျှောက်ကြေငြာပေးသည့် စနစ်ထည့် သွင်းနိုင်လျင် အခြားသော ကုမ္ပဏီများက မည်သည့် အတွက်ကြောင့် မထည့်သွင်းနိုင်ရသည်။အဓိက စည်းကမ်းဥပဒေမရှိသောကြောင့် ထည့်ချင်သူကထည့် ပြီးမထည့်လျင်လည်း ရသည်ဆိုသည့် သဘောဖြစ်နေပြီး တူညီသည့် သတ်မှတ်စံမရှိကြောင်းကို ပြောလိုရင်းဖြစ်သည်။

သတ်မှတ်ထားသည့် တူညီသည့် စံမရှိကြောင်းမည်သို့ပြောနိုင်သနည်းအထက်တွင်ဆိုခဲ့သည့်အတိုင်း မ.ထ.သခေတ်က ရိုးရိုးနှင့် အထူးယာဉ်လိုင်းဟူ၍နှစ်မျိုးပြေးဆွဲရာ တစ်ရာကျပ်နှင့် နှစ်ရာကျပ်ဟူ၍ ထူး၍ခွဲခြားရန်မလိုအပ်ပေ။

ယခု YBSခေတ်တွင်မူ ယာဉ်စီးခကို မည်သို့သတ်မှတ်သနည်း။လူထုမိတ်ဆွေကဲ့သို့ယာဉ်လိုင်းသည် ယာဉ်ပေါ်သို့တက်သည်နှင့် ငွေထည့် သည့်ပုံးတွင် ယာဉ်စီးခ ၃၀၀ကျပ်ဟုရေးထားပြီး YUPT.YUPBကုမ္ပဏီများက နှစ်ရာကျပ်ဟုသတ်မှတ်ထားသည်။ဆူးလေမှ လေဆိပ်သို့ပြေးဆွဲသောယာဉ်နှင့် မြို့ပတ်ကားများသည် ယာဉ်စီးခ ၅၀၀ကျပ်သတ်မှတ်ထားသည်။ထို့ကြောင့် အချို့ လမ်းခရီးတူသွားသည့် မိုင်ချင်းတူသော်လည်း ၂၀၀ကျပ်ပေးရသည့် ယာဉ်ရှိသကဲ့သို့ ၃၀၀ကျပ်ပေးရသည့်သဘောများလည်းရှိနေပြန်သည်။

ထိုအချက်နှင့် ပတ်သက်ပြီး ကတ်စနစ်အကောင်အထည်မဖော်နိုင်သေးသောကြောင့်ဟု အကြောင်းပြထားသော်လည်း ကတ်စနစ်မရှိချိန် ခရီးသွားပြည်သူများက အရူးသဖွယ် ယာဉ်လိုင်းတစ်ခုကို တစ်မျိုးသတ်မှတ်ထားခြင်းနေ့စဉ်ကြုံတွေ့နေရပြန်သည်။ထိုကဲ့သို့ ယာဉ်စီးခကို အမျိုးမျိုးသတ်မှတ်ထားပြီး ကိုတရုတ်လေးဦးဆောင်သည့် Power11ယာဉ်လိုင်းမှ ခရီးသွားပြည်သူများ သက်သောင့်သက်သာစီးနင်းနိုင်စေရန် ရည်ရွယ်ပြီးပြေးဆွဲပေးသည့် ခရီးသည် အပိုမတင်ဘဲ ထိုင်ခုံပြည်သာတင်ပြီး ခရီးသည် စိတ်ကျေနပ်မှုအပေါ်မူတည်ကာ စိတ်ကြိုက်ငွေပေးထည့်စေသည့်ယာဉ်လိုင်းမျိုးကိုမူ YBS၏မူဝါဒနှင့် မကိုက်ညီဟုဆိုကာ ပြေးဆွဲခွင့်ပတ်ပင်ခဲ့သည်။

ထို့ကြောင့် ခရီးသည်များ သက်သောင့်သက်သာဖြင့် စီးနင်းခွင့် လည်းဆုံးရှုံးရပြီး မည်သည့် မူဖြင့်ပြေးဆွဲနေကြောင်လည်း တိတိကျကျမရှိဘဲ နှင့် နှုတ်မိန့်ဖြင့် လုပ်ဆောင်နေခြင်းသည် ထင်ရှားနေလေသည်။

‘ အစိုးရဦးဆောင်သည့် ကုမ္ပဏီတွေရှုံးနေသည်’

အစိုးရဦးဆောင်ကာဖွဲ့စည်းပေးထားသည့် YUPTနှင့် YUPBကုမ္ပဏီများတွင် ရှယ်ယာထည့် ဝင်ထားသူများက သုံးနှစ်ကျော်ကာလသိုကရောက်ရှိနေပြီဖြစ်သော်လည်း အကျိုးအမြတ်တစ်စုံတစ်ရာမရရှိသေးသဖြင့် ထည့် ဝင်ထားသည့် ရှယ်ယာများပြန်လည်ထုတ်ယူလိုကြောင်းရှယ်ယာရှင်များက သတင်းစာရှင်းလင်းပွဲပြုလုပ်ကာ အစိုးရထံတောင်းဆိုထားကြသည်။

ထိုရှယ်ယာရှင်များက အစိုးရဦးဆောင်သည့် ကုမ္ပဏီတွင် လုပ်ငန်းမကျွမ်းကျင်သူများကို လစာ ဆယ်သိန်းကျော်ပေးကာခန့်အပ်ထားကြောင်း ထောက်ပြခဲ့သည်။လုပ်ငန်းမကျွမ်းကျင်သည့် သူများစီမံခန့်ခွဲသောကြောင့် မော်တော်ယာဉ်ပြုပြင်ထိန်းသိမ်းမှုပြုလုပ်ရာတွင် ထိရောက်မှုမရှိသောကြောင့် သတင်းစာရှင်းလင်းပွဲနေ့က အဆိုပါယာဉ်လိုင်းများတွင် မော်တော်ယာဉ်အစီးရေ ၂၀၀နီးပါးပြေးဆွဲနိုင်ခြင်းမရှိဘဲ လမ်းမပေါ်တွင်ရပ်နားထားရသည်ဟုဆိုသည်။

ဆိုလိုသည်မှာ အစိုးရဦးဆောင်သည့်ကုမ္ပဏီရှုံးခြင်းမြတ်ခြင်းသည် စီးနင်းသည့် ပြည်သူနှင့် တိုက်ရိုက်မသက်ဆိုင်ဟု ထင်မြင်စရာရှိသော်လည်း အမှန်တကယ်တွင် ပြည်သူနှင့် တိုက်ရိုက်သက်ဆိုင်သည်ဟုဆိုနိုင်ပါသည်။

အဘယ့်ကြောင့် ထိုသို့ပြောနိုင်သနည်းဟုဆိုလျင် အစိုးရကုမ္ပဏီက ယာဉ်များ စီမံခန့်ခွဲမှုညံ့ခြင်းကြောင့်ရပ်ထားရသည်ဖြစ်စေ တာဝန်ကျေစပါးစိုက်သည့် သဘောဖြင့်ပြေးဆွဲသည်ဖြစ်စေ အဆိုပါယာဉ်လိုင်းကို အားထားပြီး စီးနင်းသည့် ခရီးသည်များအတွက် ယာဉ်အစီးရေနည်းပါးပြီး လိုရာခရီးသို့ အချိန်မီမရောက်ရှိခြင်းများ ကြပ်တည်းစွာစီးနင်းရမှုများနေ့စဉ်ကြုံတွေ့လာနေရတော့သည်။

မကြာသေးမီရက်ကပိုင်းက တောင်ဥက္ကလာမှ အင်းစိန်သို့ ည၇နာရီခန့်ပြန်ရန် YUPB၏၈၈ယာဉ်လိုင်းကို မာလာကွေ့မှတ်တိုင်မှ စောင့်ဆိုင်းနေစဉ် ၈၈တစ်စီးအရှိန်နှင့် မောင်းဝင်လာပြီးမှတ်တိုင်တွင် စီးနင်းမည့်သူများက လက်ပြတားသော်လည်း ရပ်နားမပေးခဲ့ပေ။ယာဉ်မောင်းသည် ပြည်သူကို ဝန်ဆောင်မှုပေးရမည်ကိုမေ့နေပြီး ကုမ္ပဏီအတွက် မောင်းနေသည့် သဘောထား၍လားလည်းမသိပေ။အဘယ့်ကြောင့်ဆိုသော် ထိုယာဉ်ပေါ်တွင် ခရီးသည်ထိုင်ခံပင်မပြည့်သော်လည်း မှတ်တိုင်တွင်ရပ်၍မပေးခဲ့ပေ။

ထို ၈၈ယာဉ်တစ်စီးထွက်ခွာသွားပြီးမကြာမီ နောက်ထပ်တစ်စီးထပ်မံရောက်ရှိလာခဲ့ပြီး မှတ်တိုင်တွင် ရပ်နားပေးခဲ့ပြီး ၈၈ယာဉ်ပေါ်တွင် ရေးသားထားသည့် ခရီးသွားပြည်သူများ ကျေနပ်မှုမရှိလျင် တိုင်တန်းနိုင်သည်ဆိုသည့်ဖုန်းနံပတ် ​​လေးလုံးတိတိကို ခေါ်ယူကြည့် သော်လည်း အားလုံးစက်ပိတ်ထားသည်ဟုသာပြန်လည်ဖြေကြားခဲ့သည်။

ရှယ်ယာရှင်များပြောသကဲ့သို့ အစိုးရဦးဆောင်သည့် ကုမ္ပဏီကလူများသည် လုပ်ငန်သဘောကို စိတ်ဝင်စားကာကျွမ်းကျင်သူများမဟုတ်နိုင်ဟု ထိုအချက်ကိုကြည့်လျင် သိနိုင်သည်။ပုဂ္ဂလိကယာဉ်လိုင်းဖြစ်သည့် ကိုတရုတ်လေးယာဉ်လိုင်းတွင် အချိန်မရွေးဖုန်းဆက်လျင် လေးလေးစားစားဖြင့် ပြန်လည်ဖြေကြားပေးပြီး ပြေးဆွဲသည့် လမ်းကြောင်းအတိုင်းမပြေးလျင် တက္ကစီခတောင်းယူပါဟုပင် အတိအလင်းရေးထားသည်က ဝန်ဆောင်မှုကွာခြင်းကိုပြောလိုရင်းဖြစ်သည်။

အစိုးရဦးဆောင်သည့် ယာဉ်လိုင်းများတွင် အမြတ်မရရှိဘဲ ပြေးဆွဲနေမည်ဆိုပါက နောင်တွင် ယာဉ်အသစ်များမဝယ်နိုင်ပါက မ.ထ.သ ခေတ်ကကဲ့သို့ ကားစုတ်များကို ပြည်သူများက ပြည်လည်စီးနင်းရမည့် သဘောကို ကြိုတင်ထောက်ပြခြင်းလည်းဖြစ်သည်။

ဘယ်အခြေအနေကအဆိုးဆုံးလဲ
မ.ထ.သမှ YBSစနစ်သို့ကူးပြောင်းချိန်တွင် ယာဉ်အသစ်များကို အဲကွန်းကောင်းကောင်းဖြင့် စီးနင်းလာရသဖြင့် တိုးတက်မှုများလည်း များစွာရှိခဲ့ပြီး ထိုအခြေအနေမှမ.ထ.သခေတ်ကဲ့သို့ နောက်ပြန်မသွားရန် ပြောလိုရင်းဖြစ်သည်။

သို့သော်လည်း YBSစနစ်ပြေးဆွဲမှုအချိန်ကြာလာသည်နှင့် အမျှ တိုးတက်မှုထက် ဆုတ်ယုတ်မှုများကိုပိုမိုတွေ့နေရသည်ကလည်း များစွာစိတ်မကောင်းဖြစ်မိသည်။

‘ ပြည်သူစိတ်ပျက် YBS မဖြစ်စေလို ‘

ရန်ကုန်တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျပြောသကဲ့သို့ ပြည်သူစိတ်ပျက် YBSမဖြစ်စေရန် အကြံပြုခြင်းဖြစ်သည်။YBSစတင်ပြေးဆွဲစဉ်က ယာဉ်စီးရေမလုံလောက်မှုကြောင့် အောက်ဆိုဒ်ကားများပြေးဆွဲသည်ဟု ထင်ရသော်လည်း ယခုအခါ အဆိုးရွားဆုံးအဖြစ် နေ့ခင်းအချိန်များပင်လျင် အောက်ဆိုဒ်ကားများ ပေါ်ပေါ်တင်တင်ပြေးဆွဲနေကြပြီဖြစ်သည်။

မကြာသေးမီက ကမ္ဘာအေးဘုရားလမ်းပေါ်တွင် နံနက်၈နာရီခန့်အချိန်ကားစောင့်နေရာ မည်သည့် YBSတံဆိပ်မျှတပ်ဆင်ထားခြင်းမရှိသည့် ဟွန်ဒိုင်းယာဉ်ကြီိးတစ်စီးသည် မှော်ဘီိနှင့်ဆူးလေဟုအော်ကာ ပြေးဆွဲနေလေသည်။ယာဉ်၏ရုပ်ထွက်က စစ်ဘေးဒဏ်ခံထားရသည့် အလားဖြစ်နေသော်လည်း လူတစ်ယောက်လျင် ၃၀၀ကျပ်ဟုအော်ကာ ခရီးသည်များကိုစပါယ်ယာကခေါ်နေလေသည်။နံနက်ရုံးသွားချိန်ဖြစ်သောကြောင့် ရွေးချယ်စရာနည်းပါးသည့် ပြည်သူများက မည်မျှပင်စုတ်နေသည့် ကားဖြစ်ပါစေ ဥပဒေပြင်ပကပြေးဆွဲသည့် ကားဖြစ်ပါစေ ရုံးအမီရောက်ရန် ထိုကားကိုလည်းစီးနင်နေကြသည်မှာ ထိုင်ခုံပြည့်သည့်အပြင် တွယ်စီးနေသူများကိုပါတွေ့မြင်နေရသည်။

YBSယာဉ်များ အများပြည်သူကို ဝန်ဆောင်မှု အပြည့်အဝမပေးနိုင်ကြောင်းက ထိုအချက်များကိုထောက်ရှု့လျင်သိနိုင်ပြီး ထို့ထက်ဆိုးရွားသည်က ညနေသုံးနာရီခန့်အချိန်ပင်ရှိသေးသော်လည်း မဟာဗန္ဓုလလမ်းနှင့် ပန်းဆိုးတန်းလမ်းတွင် အောက်ဆိုဒ်ယာဉ်အများအပြားက ခရီးသည်များကို ပေါ်ပေါ်တင်တင်ခေါ်ယူနေကြသည်။အောက်ဆိုဒ်ကားအများစုသည် အနည်းဆုံးငါးရာကျပ်မှ တစ်ထောင်ကျပ်ထိ ပေးရပြီး ရွေးချယ်စရာနည်းပါးသည့် ပြည်သူအများစုက ထိုယာဉ်များကို စီးနင်းနေရသည်။

အောက်ဆိုဒ်ကားအများစုသည် YBSကားများထက် ရမ်းရမ်းကားကားမောင်းကာ ခရီးသည်လုလေ့ရှိသဖြင့် ထိုကားများကိုစီးရသည်က အများပြည်သူအတွက် အန္တရယ်ကြီးလှသည်။

သို့သော်လည်း အစိုးရက သူမနိုင်သည့် လုပ်ငန်းကို ထိုအောက်ဆိုဒ်ကားများက ဖြည့်စီးပြေးဆွဲပေးနေသည့် သဘောပိုက်ကာ မျက်ကွယ်ပြုပြီးနေသည့်သဘောဆောင်နေလေသည်။

မ.ထထ.သမှYBSသို့ပြောင်းလဲလိုက်ပြီး ယာဉ်အများစု ရုပ်ထွက်ကောင်းမွန်လာခဲ့သည်မှာမှန်သော်လည်းစီမံခန့်ခွဲမှု မပြောင်းလဲလျင် အနှစ်သာရမပြောင်းလဲလျင် မ.ထ.သအတိုင်းသာဖြစ်မည်ဟုသာဆိုချင်ပါတော့သည်။

ဇော်ထွန်း
ref:TheFifthWaveNews