ပဲခူးတိုင်း ဝန်ကြီးချုပ် ဦးဝင်းသိန်း ပြည်သူများကို ပြန်တောင်းပန်

“တပ်မတော်က အာဏာသိမ်းရန် ပြည်သူများက လုပ်ဆောင်နေသည်”ဟု ပြောဆိုခဲ့ခြင်းအပေါ် နားလည်မှုလွဲသွားသည့်အတွက် ပဲခူးတိုင်းဝန်ကြီးချုပ်က ပြည်သူများကို ပြန်လည်တောင်းပန်သည်ဟု ပဲခူးဒေသခံ သတင်းမီဒီယာများထံမှ သိရသည်။ပဲခူးတိုင်းဝန်ကြီးချုပ်သည် မတ်လ ၁၁ ရက်နေ့က ပဲခူးဒေသခံ သတင်းမီဒီယာများကို ခေါ်ယူအသိပေးပြောကြားခဲ့ခြင်းဖြစ်သည်ဟု ၎င်းတို့က ပြောဆိုသည်။

“ဒီစကားအတွက် ပြည်သူတွေပြောဆိုနေတာကိုတော့ ဘယ်လိုမှမတုန့်ပြန်ပါဘူး။ ဒါပေမဲ့ သတင်းတွေမှာပါတဲ့ဟာကို လိုက်ဖက်ကြည့်တော့ နားလည်မှုလွဲနေတာမြင်ရတယ်။ စကားလုံးအချို့ လိုအပ်ချက်တွေရှိခဲ့တာနဲ့ပတ်သက်ပြီး ပြည်သူတွေကို ကျွန်တော်တောင်းပန်ပါတယ်”ဟု ပဲခူးတိုင်းဝန်ကြီးချုပ်က သတင်းမီဒီယာများမှတဆင့် ပြန်လည်ပြောကြားခဲ့သည်။

ကျောက်တံခါးမြို့နယ် သရက်စိန်ကျေးရွာသို့ မြေယာကိစ္စဖြေရှင်းပေးရန် ရောက်ရှိနေချိန်တွင် မြေယာပြသနာများနောက်ကွယ်တွင် မညီမညွတ်မှုများ၊ မကျေလည်မှုများရှိနေသည့်အတွက် ယင်းတို့ကို အခြေခံကာ ပြည်သူများအား ဥပမာပေးပြောဆိုခဲ့ခြင်းကို နားလည်မှုလွဲမှားခြင်းဖြစ်သည်ဟုလည်း ပြောဆိုခဲ့သည်။

မတ်လ ၇ ရက်နေ့က ကျောက်တံခါးမြို့နယ် သရက်စိန်ကျေးရွာ ဓမ္မသိဒ္ဓိ ဘုန်းတော်ကြီးကျောင်း၌ပြုလုပ်သည့် လူထုတွေ့ဆုံပွဲတွင် ပြောဆိုခဲ့သည့်စကားနှင့်ပတ်သက်၍ ပဲခူးတိုင်းဝန်ကြီးချုပ် ဦးဝင်းသိန်းအနေဖြင့် တစ်နိုင်ငံလုံးရှိ ပြည်သူများကို ဝန်ချတောင်းပန်ရန် ပြည်ခရိုင် နိုင်ငံရေးအကျဉ်းသားဟောင်းများအဖွဲ့က တောင်းဆိုထားသည်။

ဝန်ကြီးချုပ်အဖြစ် တာဝန်ယူခဲ့ပြီး လေးနှစ်ကျော် ငါးနှစ်နီးပါးအတွင်း ၎င်းပြောဆိုခဲ့သည့် စကားရပ်အချို့ကြောင့် ဝေဖန်ခံနေရသူလည်း ဖြစ်သည်။

ref:The Voice