COVID-19 ပိုးတွေ့ လူနာ နံပတ် (၄) အား တတိယအကြိမ် ဆေးပြန်စစ်ရာတွင် ပိုးမရှိ (Negative) ပြပြီး ကျန်းမာရေး ပြန်ကောင်းလာ

မန္တလေးမြို့ ကန်တော်နဒီဆေးရုံတွင် COVID-19 ဗိုင်းရပ်စ်ပိုး ကူးစက်ခံရကြောင်း အတည်ပြုထုတ်ပြန်ထားသည့် လူနာ နံပတ် ၄ အမျိုးသားအား တတိယအကြိမ်မြောက် ဆေးပြန်စစ်ရာတွင် Negative ဖြစ်နေပြီး လူနာ၏ ကျန်းမာရေးအခြေအနေ ကောင်းမွန်လျက်ရှိကြောင်း မန္တလေး အထွေထွေ ရောဂါကုဆေးရုံကြီးမှ ဒုတိယဆေးရုံအုပ်ကြီး ဒေါက်တာခင်ကျော်က ဧပြီ ၃ ရက်တွင် ပြောသည်။

ယင်းလူနာအား ၅ ရက်တစ်ကြိမ်နှုန်းဖြင့် ပြန်လည်ဆေးစစ်ခြင်းများ ဆောင်ရွက်နေခြင်းဖြစ်ကာ ပထမနှင့် ဒုတိယအကြိမ်များတွင် positive (ရောဂါပိုးတွေ့) ဖြစ်နေခြင်းဖြစ်ကာ ဧပြီ ၂ ရက်က တတိယအကြိမ် စစ်ဆေးရာတွင် Negative (ရောဂါမတွေ့) ဖြစ်နေကြောင်း ၎င်းကပြောသည်။

“ လူနာက အခြေအနေကောင်းတယ်။ အခုဆိုရင် အောက်ဆီဂျင် မပေးရတော့ဘူးပေါ့၊ အောက်ဆီဂျင်လွှတ်တယ် ဆိုကတည်းက သူက လန်းလန်းဆန်းဆန်းနဲ့ အခြေအနေကောင်းလာတာပေါ့။ သူရဲ့ အဆုတ်ကို ဓာတ်မှန်ရိုက်ကြည့်တော့လည်း အခြေအနေ ပြန်ကောင်းလာတယ်။ သူ့အမျိုးသမီးကို စစ်ဆေးကြည့်တဲ့အချိန်တုန်းကလည်း ရောဂါပိုးမတွေ့ရဘူးပေါ့ ” ဟု ဒေါက်တာ ခင်ကျော်က ပြောသည်။

ref:myanmar.mmtimes.com